Недостигот од безбедна вода за пиење во Гостивар веќе четврта недела претставува сериозна закана за јавното здравје, предупредува доктор Александар Трајановски. Тој посочува дека покрај веќе регистрираните случаи со повраќање, дијареја и покачена телесна температура, продолжувањето на ваквата состојба може да доведе и до појава на вирусни хепатити поради неможноста граѓаните да одржуваат соодветна лична хигиена.
Според Трајановски, кој е и потпретседател на опозициската СДСМ кризата што трае од крајот на јуни ја покажала неподготвеноста и недоволната координација на институциите. Тој смета дека прогласувањето епидемија требало да се случи порано, со цел навремено да се зајакнат капацитетите и да се направи проценка на состојбата на терен.
Трајановски ја повика Владата транспарентно да ги информира граѓаните за резултатите од испитувањата на водата и причините за загадувањето, оценувајќи дека јавноста не смее да чека до 20 август за одговори. Според него, наместо политички препукувања, потребни се брзи и конкретни мерки за заштита на здравјето на граѓаните.
