Според последните податоци од Регистарот за цени и закупнини, кои денеска ги објави Агенцијата за катастар на недвижности, највисока цена за продаден деловен простор во првата половина од годината е регистрирана во Центар, со површина од 3.131 квадратен метар, а цената достигнала 6.800.000 евра. Најскапиот индустриски објект, пак, се наоѓа во Илинден и е продаден за 190.130.726 денари. Гаражата со највисока продажна цена во Аеродром, со површина од 24 квадратни метри, е продадена за 1.854.000 денари, односно 77.250 денари по квадратен метар.
„Најзначајниот пораст на цените на становите, во однос на истиот период лани, се забележува во Охрид – 27 проценти, Центар – 22 проценти, Тетово – 22 проценти, и Битола – 20 проценти, додека најмал раст има во Струмица – 2 проценти“, се наведува во Извештајот.
Бројот на продажби на станови во првите шест месеци од 2025 година е највисок во Аеродром – 189, следени од Чаир – 182, Центар – 181, и Карпош – 179. Вкупната вредност на продажбите достигнува 1.261.042 илјади денари во Центар, 1.193.353 илјади денари во Аеродром и 1.064.588 илјади денари во Карпош. Највисока просечна цена по квадратен метар се постигнува во Центар, 101,9 илјади денари, додека во Карпош е 90,9 илјади денари.
Според движењето на цените во првата половина од годинава во однос на истиот период од лани, Тетово забележува пораст од 60 проценти, Велес 54 проценти, а Охрид 50 проценти. Најголем пад на бројот на продадени станови е во Куманово – 16 проценти.
Во Регистарот за цени и закупнини од 1 јануари до 30 јуни годинава се документирани вкупно 15.779 трансакции, што е за 8,9 проценти повеќе во споредба со првото полугодие од 2024 година. Оваа зголемена активност може да се оправда со подобрените услови за финансирање и зголемената доверба во пазарот на недвижности.
Во првата половина од 2025 година забележани се 8.910 продажби на недвижности, 1.693 продажби од инвеститори, 439 откупни трансакции и 63 лицитации, што вкупно изнесува 11.105 купопродажби, што укажува на раст од 4,9 проценти во однос на првата половина од минатата година.
Во целата Македонија, во првите шест месеци од 2025 година, се регистрирани 4.674 закупи, што е 20 проценти повеќе од првата половина на 2024 година.
Пазарот на недвижности во првите шест месеци од 2025 година пораснал за 15,5 проценти во споредба со истиот период од 2024 година, со вкупна остварена купопродажна цена од 515,9 милиони евра. Најголемиот обем на финансиски трансакции е забележан во мај, а најмал во јуни 2025 година. Во категориите на недвижности, земјоделското земјиште и шумите доминираат со 32,8 проценти, а становите со 32,5 проценти од вкупниот број на купопродажби.
Најмногу купопродажби во првата половина од 2025 година има во Аеродром – 562, Гази Баба – 555 и Карпош – 527, а најмалку во Бутел – 176. Највисока вкупна вредност на продажбите е постигната во Центар – 65,8 милиони евра, Карпош – 56,7 милиони евра и Аеродром – 47,9 милиони евра, додека најниската бележи Штип со 10 милиони евра.
Во споредба со истиот период од претходната година, Центар има највисок раст на купопродажби со 32 проценти, додека Гази Баба и Штип растат за 28 проценти. Најзначајниот пад е забележан во Аеродром со 29 проценти.
Ако ја разгледаме вкупната вредност на остварените продажби во однос на истиот период лани, највисок раст од 59 проценти бележи Кисела Вода, а најголем пад има Куманово со 26 проценти.
