Министерството за надворешни работи на Република Бугарија изрази сериозна загриженост поради последната одлука на судот во Кочани да го отфрли барањето на 23-годишната Ива Михајлова за лекување во Бугарија. Михајлова има двојно државјанство, македонско и бугарско, се изјаснува за Бугарка, обвинета е за предизвикување на сообраќајна несреќа со еден загинат и бара да и се вратат пасошите за лекување на повредениот рбет во Бугарија.
-Мислењето на локалната надлежна здравствена установа јасно ја наведува не само тешката дијагноза, туку и невозможноста да се обезбеди пропишаниот третман во Македонија и потребата тој да се спроведе во друга земја. Инститираме Ива Михаилова да добие пристап до навремена и соодветна медицинска нега со цел да се избегне реалната опасност од траен инвалидитет со неповратни последици врз нејзиното право на достоинствен живот, наведува МНР на Бугарија во своето соопштение.
МНР на Бугарија ја користи вчерашната судска одлука на кочанскиот суд да го отфрли последното барање на Михајлова за лекување во странство за коментар за европскиот пат на Македонија.
-Потсетуваме дека сите држави потписнички на Европската конвенција за заштита на човековите права и основните слободи се должни да ги штитат човековите права на своите граѓани. Во случајот со Ива Михаилова, потенцираме да се обрне внимание на почитувањето на правото на живот, забраната за нечовечко и понижувачко постапување, како и обезбедувањето ефикасни правни лекови. Во овој поглед, постојаните негативни констатации на Европската комисија за состојбата на судскиот систем во Северна Македонија не се случајни. Нагласуваме дека владеењето на правото е меѓу водечките услови за секој напредок на земја-кандидат кон членство во Европската Унија, велат од МНР во Софија.
Случајот го злоупотребија и двајца пратеници од бугарската десничарска проруска партија „Преродба“ кои иако со забрана за влез во Македонија поради нелегално преминување на границата, минатата недела ја преминаа границата кај Делчево и беа во судница во Кочани. Пратениците Крсто Врачев и Ангел Георгиев ја коментираа и судската постапка, со навреди за обвинителот, судиите и правната држава.
По информацијата која ја објави Телма за преминувањето на граница на луѓе со забранет влез со судска одлука, МВР соопшти дека доколку има пропусти ќе има одговорност за полициски гранични службеници и дека Внатрешната контрола ќе го испита случајот.
