Кандидатот за градоначалник на Чаир, Бујар Османи, со јасна и емоционална порака се обрати до граѓаните, нагласувајќи дека неговиот нов приоритет, целосна посветеност и енергија се насочени кон решавање на проблемите на оваа скопска општина.
„Ми велат, кога беше министер за надворешни работи, не си бил доволно присутен меѓу граѓаните. Да, затоа што тогаш мојата мисија беше Брисел и Вашингтон, таму се водеше битката за иднината на државата. Но денес, мој Брисел е Чаир., мојот Вашингтон е Чаир“, истакна Османи, порачувајќи дека целото негово знаење, искуство и време ги става во служба на Чаир и неговите жители.
Во своето обраќање, Османи уште еднаш ја повтори суштинската политичка порака на својата кампања дека промената е неопходна и итна.
„Едно на сите им е јасно не може оној што бил 20 години дел од проблемот денес да дојде и да каже: ‘Јас сум решението’“, потенцираше Османи.
Тој го најави својот пристап како нова енергија и нов дух во управувањето со Чаир, пристап кој почнува со чесност, дисциплина и конкретни мерки.
„Полека, но сигурно, чекор по чекор, ќе почнеме со најгорливите проблеми хигиената, дивоградбите, нелегалните згради, паркинзите, сообраќајниот хаос, се за луѓето конечно да можат да живеат достоинствено“, додаде тој.
„Тоа е мојата мисија. Тоа е причината зошто сум влезен во оваа трка. Ден и ноќ ќе работам за Чаир, но за тоа ми треба вашата поддршка. Бидете мојата сила, мојата мотивација да ја спроведеме долгоочекуваната промена“, повика Османи.
