Скопје, 29 август – Кандидатот за градоначалник на Чаир, воедно и потпретседател на ДУИ, Бујар Османи, неодамна во интервју за ТВ21-Македонија беше прашан дали по заминувањето на Артан Груби, станал најблизок човек до претседателот на ДУИ, Али Ахмети.
Новинарот го потсети Османи дека Груби отсекогаш бил оној што стоел покрај Ахмети, грижејќи се за неговиот јавен имиџ и појавувајќи се покрај него во секое видео и активност.
Во својот одговор, Османи негираше таква улога за себе, велејќи дека „еквидистанца“ на Али Ахмети со неговите соработници е поздрава за партијата.
„Не, не, всушност ми се допаѓа што сега има еквидистанца помеѓу г-дин Ахмети и луѓето околу него. Мислам дека е поздраво. Претседателот Ахмети комуницира со сите подеднакво, со секретарот, со потпретседателите, со другите. Ова ја отвори партијата и ми се допаѓа ова. Никогаш не би сакал да бидам „најблизок“, дури и да ми се даде шанса, бидејќи тоа не е добро за партијата“, рече Османи.
Со оваа изјава, Османи јасно имплицираше дека практиката на Артан Груби да ја монополизира блискоста со Ахмети ѝ наштетила на ДУИ, додека според него, партијата сега ја плаќа сметката за тој период.
