Министерството за енергетика, рударство и минерални суровини (МЕРМС) соопшти дека транспарентноста и вклученоста се основа на подготовката на новиот Закон за рударство. Нацрт-текстот беше објавен на платформата ЕНЕР уште во рана фаза, овозможувајќи јавен увид и учество на сите засегнати страни.
Јавната расправа траеше 30 дена и заврши на 28 август 2025 година, а во тој период пристигнаа голем број предлози и забелешки од компании, институции, експерти и граѓани.
,,Јавната расправа ни овозможи вредни препораки за Нацрт-законот. Сега започнуваме со фазата на усогласување, каде детално ќе ги разгледаме сите предлози и ќе организираме средби со оние кои се изјасниле за текстот. Нашата цел е закон кој обезбедува заштита на животната средина, висока безбедност при работа и предвидлива инвестициска рамка,“ изјави министерката Сања Божиновска.
Од Министерството истакнуваат дека ќе бидат прифатени сите конструктивни предлози во интерес на државата и граѓаните, со цел креирање на современа и правична рамка за развој на рударството.
Финалниот закон, според најавите, ќе донесе одржлива експлоатација на минерални суровини според европски стандарди, засилена контрола и транспарентност во процесите, задолжителни мерки за рекултивација и заштита на локалните заедници, како и јасна регулатива за сите учесници во секторот.
Министерството нагласува дека ќе има нулта толеранција за прекршувања, со фокус на безбедноста, заштитата на животната средина и добросостојбата на граѓаните.
