Спектакуларен концерт синоќа во Хераклеја одржаа Битолскиот камерен оркестар „IWConnect“ и гостинките, светски познатата виолончелистка Ана Руцнер од Хрватска (фото), оперската певица од Косово Зана Абази-Рамадани и македонските оперски пејачки Виолета Арсовска, сопран со богата музичка кариера и Јаворка Витанова, млада оперска дива.
На концертот „Цветна симфонија“ Хераклеја беше преполна до последно место, а гостите од Македонија и странство уживаа во повеќе од двочасовната класична музичка изведба, која ги славеше љубовта, уметноста, традицијата и природната убавина.
Публиката беше воодушевена од магичната изведба на хрватската виолончелистка Ана Руцнер, на која ова ѝ беше деби на македонската музичка сцена. Досега имала 1.000 настапи во над 30 земји низ светот. Добитничка е на над 30 домашни и меѓународни признанија и позната е по својот иновативен и уникатен пристап во изведбата на класичната музика, која ја збогатува со модерни и етноелементи. Нејзината кариера опфаќа соработки со музичари како Хосе Карерас, Питер Суаве и други. Ја претставуваше Босна и Херцеговина на Евровизија во 2016.
На пет минути пред крајот на концертот заврна дожд. Дел од публиката замина, но диригентот на Оркестарот Владимир Димовски соопшти дека музичкото уживање не завршува, па изведбата продолжи и понатаму за оние кои останаа до крај.
Ж. ЗДРАВКОВСКА
