Нови потресни детали се откриени за трагедијата во Грција, во која двајца пожарникари на возраст од 23 и 44 години го загубија животот додека се обидувале да изгаснат пожар во напуштена зграда во населбата Зефири, во поширокото подрачје на Атина.
Според првичните сведоштва на нивните колеги, двајцата пожарникари најверојатно пропаднале низ отвор покрај скалите и завршиле во подрум исполнет со отпад и пламен, од каде што не успеале да се извлечат.
Претседателот на Панхеленскиот синдикат на пожарникарите, Константинос Папантонис, со солзи во очите ги опишал информациите што ги добил од колегите кои биле на местото на несреќата.
Тој објаснил дека во внатрешноста на објектот имало спирални скали, а покрај нив отвор што водел кон подрум.
Според неговите информации, пожарникарите стапнале во пределот на скалите и пропаднале во празниот простор.
Под нив се наоѓал тесен подрум, исполнет со смет и оган. Просторот бил толку мал што не можеле повторно да се искачат и да излезат од него.
Папантонис нагласил дека ова се информации што му ги пренеле повеќе колеги, но дека сè уште не може со сигурност да потврди како точно се случила несреќата.
Трагедијата се случила во саботата, на 14 ноември, откако околу 11:40 часот противпожарната служба добила пријава за пожар во напуштен објект на улицата Кацандони, во општината Фили.
На местото веднаш биле испратени 20 пожарникари со шест противпожарни возила, како и специјализирани спасувачки екипи.
Додека пожарникарите интервенирале во внатрешноста, дел од конструкцијата на објектот попуштил, по што неколкумина останале заробени.
Двајцата пожарникари биле извлечени без свест и пренесени во болница, каде што била потврдена нивната смрт. Во несреќата бил повреден и трет пожарникар.
Особено потресно е сведоштвото на жител од населбата, кој раскажал дека пожарот однадвор не изгледал голем.
Тој забележал чад и слушнал сирени, по што пристигнале пожарникари, полиција и возила на итната медицинска помош.
Според неговото сведоштво, пожарникарите биле видно вознемирени, а некои од нив плачеле по трагичниот настан.
Жителот објаснил дека зградата порано служела како работилница за производство на алуминиумски врати и други производи.
Надлежните органи сега истражуваат дали двајцата пожарникари починале од задушување поради густиот чад или биле смртно повредени од деловите на конструкцијата што се урнале.
Причината за избувнувањето на пожарот, како и точните околности на трагедијата, сè уште се утврдуваат.
Грчката противпожарна служба соопшти дека станува збор за исклучително тежок ден за сите нејзини припадници.
По наредба на началникот на противпожарната служба, знамињата на сите нејзини објекти ќе бидат спуштени на половина копје во знак на жалост за двајцата загинати пожарникари.
