На околу 35 километри од брегот на бразилската сојузна држава Сао Пауло се наоѓа остров на кој луѓето речиси и да немаат пристап. Илја да Кејмада Гранде, познат и како Островот на змиите, е природно живеалиште на околу 3.000 примероци од еден од најнеобичните и најретките видови отровни змии во светот.
Островот зафаќа површина од околу 43 хектари, долг е приближно 1,5 километри и има стрмни брегови поради кои е тешко достапен. Нема постојани жители ниту извори на вода за пиење, но претставува единствен екосистем во кој со илјадници години се развивал посебен животински свет.
Најпознат жител на островот е златната островска јамичарка (Bothrops insularis) – отровна змија што природно не се среќава на ниту едно друго место на планетата. Поради долгогодишната изолација, овој вид развил посебни приспособувања, особено во начинот на исхрана. За разлика од сродните змии на копното, кои најчесто ловат мали цицачи, златната островска јамичарка се приспособила на лов на птици.
Според податоците на бразилскиот Институт „Бутантан“, на островот живеат околу 3.000 примероци од овој вид. Големата концентрација на змии на релативно мала површина го прави ова едно од местата со најголема густина на популација на еден вид змии во светот.
Од 1985 година островот е заштитено подрачје, а пристапот е строго ограничен, како поради опасноста од отровните змии, така и заради зачувување на неговиот единствен животински свет. Таму можат да престојуваат само посебно овластени истражувачи и стручни лица, со претходна дозвола од надлежните институции и со соодветна заштитна опрема.
Заштитата е неопходна и поради тоа што златната островска јамичарка е загрозен вид. Ограничувањето на човечкото присуство помага да се спречат уништувањето на вегетацијата и нелегалното собирање животни.
Овој необичен екосистем настанал пред илјадници години, кога поради покачувањето на нивото на морето дел од копното бил одделен од континентот. Изолирани од копнените популации, змиите постепено се приспособувале на новите услови и недостигот од вообичаениот плен. Така развиле способност да ловат птици што застануваат на островот за време на преселбите.
Иако со години се раскажуваат бројни легенди за Островот на змиите, научниците предупредуваат дека дел од приказните што се шират за него не се поткрепени со докази. Отровот на златната островска јамичарка навистина е опасен, но тврдењата за неговата наводно натприродна сила не се точни.
Денес Илја да Кејмада Гранде претставува важен природен резерват, кој научниците внимателно го проучуваат со цел да се зачува еден од најретките видови змии во светот.
