Пред објавувањето на неговите мемоари насловени The Steps – кои излегуваат на 29 септември – Силвестер Сталоне во ново интервју отворено зборуваше за своето детство, одбележано со напуштеност, насилство и речиси целосен недостиг на нежност. Тој за „Њујорк тајмс“ изјави дека намерно изоставил некои од најмрачните приказни од книгата бидејќи не сакал читателите да го сожалуваат.
„Изоставив многу работи од книгата бидејќи не сакав да предизвикам сожалување… но ситуацијата беше лудачка“, призна тој. По разводот на родителите, Сталоне извесно време живеел со својот татко во Мериленд. Тој го опиша својот татко како човек со непредвидлив карактер и склон кон физичко насилство.
„Во еден момент – бам! Имаше огромни дланки. Едноставно учеше брзо да се наведнеш за да избегнеш удар“, рече тој. Едно сеќавање, како што пренесува „Фокс њуз дигитал“, останало особено врежано во умот на Сталоне. Холивудската ѕвезда раскажа како, пред да заминат во црква, татко му го испратил во продавница да купи леб. Патем, Сталоне сретнал пријатели и се вратил со векна леб со јатки.
„Тој ме удри со нога во стомакот и продолжи да ме удира – практично ме собори на земја – а потоа влезе во автомобилот и замина во црква“, раскажа тој, додавајќи дека потоа бил оставен да лежи на улицата. Години подоцна, Сталоне се соочил со својот татко. Кога имал четириесетина години, Сталоне му рекол: „Би сакал ти и јас да бидеме на иста возраст три минути“. Кога татко му го прашал зошто, Сталоне одговорил: „Затоа што би сакал да ти го вратам истото, и сакам да знаеш какво е чувството кога некој добро ќе те претепа“. Сталоне рече дека тогаш татко му го предизвикал на тепачка – бил подготвен за физичка пресметка на 68-годишна возраст. Ѕвездата на филмот Роки ја поврза таа жестокост со еден од ликовите по кои е најпознат.
„Значи, кога луѓето прашуваат: ‘Од каде ја црпиш таа жестокост за да го играш Рамбо?’ – Генетика“, откри тој. Сталоне исто така се присети дека мајка му никогаш не му покажувала наклонетост.
„Мајка ми никогаш – а брат ми може да го потврди ова – не ме прегрна. Никогаш, ама баш никогаш“, раскажа актерот. И татко му ретко покажувал наклонетост. Сепак, кога Сталоне имал околу девет години, заспал во автомобилот откако работел со коњите на татко му. Тогаш татко му ја потпрел главата на Сталоне на своето колено и ја ставил раката врз неговата глава.
„И тоа никогаш не го заборавив“, нагласи тој. Сталоне претходно има опишано како, на многу рана возраст, бил испратен да живее во пансион, каде што родителите го посетувале само еднаш месечно.
„Ме одгледаа странци, знаете, во пансион. И со текот на времето, тоа стана некаква природна средина. А бидејќи родителите никогаш навистина не ми покажувале грижа или наклонетост, ова всушност беше еден вид предност во споредба со местото каде што живеев претходно“. Сталоне призна дека оваа емоционална празнина го обликувала во човекот што станал. Кога го прашаа дали тоа го направило силен, тој одговори: „На погрешен начин, да. Ме направи многу силен“. Сепак, таа сила имаше своја цена. Сталоне рече дека не ја доживеал онаа што ја смета за вистинска, искрена љубов сè додека не наполнил околу 70 години, кога ја почувствувал со сопругата и децата.
