Од 1 октомври во Хрватска стапуваат на сила нови правила за прикажување на цените, а трговците и давателите на услуги веќе предупредуваат дека имаат многу малку време за да ги прилагодат своите системи.
Хрватската комора на занаетчии објавила упатства со кои дополнително се објаснува начинот на кој ќе треба да се истакнуваат цените. Покрај актуелната цена на производот или услугата, задолжително ќе треба јасно да биде наведена и дополнителна референтна, односно „сидрена“ цена.
За најголемиот дел од стоките и услугите како референтен датум ќе се зема 10 септември 2026 година. Исклучок се одредени категории производи, меѓу кои храна, пијалаци, козметика, средства за чистење, тоалетни производи и производи за домаќинство. За нив продолжува да се применува цената што важела на 2 мај 2025 година.
Од Комората појаснуваат дека референтната цена не го укинува постојното правило според кое при намалување мора да се прикаже и најниската цена по која производот се продавал во претходните 30 дена.
Токму поради комбинацијата на овие правила, кај одредени производи кои се на акција потрошувачите би можеле истовремено да видат дури четири различни цени.
Претседателката на Секцијата на сметководители при Хрватската комора на занаетчии, Ѓурѓица Мостарчиќ, за ХРТ изјавила дека одлуките биле донесени во релативно краток период и дека немало советување пред нивното усвојување. Според неа, на трговците им останало исклучително малку време за неопходните прилагодувања.
Комората дала дополнителни објаснувања и за производите кои на референтниот датум не биле физички достапни во продавницата, но биле дел од асортиманот. Во таков случај ќе се користи цената која на 10 септември била евидентирана во ценовникот или во соодветниот систем.
За производите и услугите кои биле воведени по референтниот датум, се препорачува цената да биде евидентирана во моментот кога првпат се појавиле во понудата, а трговците и давателите на услуги да зачуваат доказ за тоа.
Особено внимание ќе треба да посветат оние кои нудат услуги со индивидуално договорени цени. Како примери се наведуваат кетерингот, организацијата на свадби и различни видови приеми.
Новите обврски се однесуваат и на онлајн продажбата. Компаниите и давателите на услуги кои имаат сопствени веб-страници ќе мора да ги објавуваат ценовниците во XML или CSV формат, кој овозможува автоматска обработка на податоците.
Тоа значи дека ценовниците нема да може да се објавуваат само како PDF, Word или Excel документи.
За трговците кои продаваат стока, ценовникот ќе треба да се ажурира секој ден, најдоцна до 8:00 часот. Давателите на услуги, пак, ќе имаат обврска да го ажурираат ценовникот секогаш кога ќе дојде до промена на цените.
