Голема полициска акција се одвивала два дена во пограничното подрачје покрај реката Сава, на границата меѓу Босна и Херцеговина и Хрватска, при што биле пронајдени и приведени речиси 100 мигранти кои, според полицијата, имале намера незаконски да ја преминат границата.
Акцијата била спроведена од полицијата во Босна и Херцеговина во координација со хрватските гранични служби, откако од хрватската страна било забележано и пријавено движење на поголема група мигранти во поширокото подрачје на Босанска Градишка.
Првиот поголем случај бил регистриран во попладневните часови во средата, во местото Бистрица. Таму граничната полиција на БиХ спречила обид на 63 лица да ја преминат државната граница на недозволен начин.
Меѓу приведените имало 40 државјани на Пакистан и 23 државјани на Бангладеш.
Во рамките на акцијата полицијата идентификувала и две лица за кои постои сомнение дека биле инволвирани во криумчарење мигранти. При претресите биле запленети и два чамци, за кои според полициските информации било планирано да бидат користени за преминување на реката Сава.
Акцијата продолжила и во вечерните часови. Припадници на Граничната полиција на БиХ, заедно со полицајци од Министерството за внатрешни работи на Република Српска, откриле уште една поголема група лица кои, според првичните сознанија, се подготвувале илегално да ја преминат границата со Хрватска.
Во оваа група биле пронајдени 33 лица.
Од нив, 18 биле државјани на Авганистан, 13 на Бангладеш и двајца на Пакистан.
Сите приведени лица биле предадени на надлежната Служба за работи со странци при Министерството за безбедност на Босна и Херцеговина, каде што треба да продолжи понатамошното постапување согласно законските процедури.
Зголемен бројот на илегални мигранти во БиХ
Најновата акција доаѓа во период кога Босна и Херцеговина бележи зголемено присуство на мигранти кои ја користат земјата како транзитна точка на патот кон Европската Унија.
Според последниот достапен извештај на Министерството за безбедност на БиХ, бројот на нерегуларни влезови во земјата во првите четири месеци од годинава бил за 67,5 проценти поголем во споредба со истиот период во 2025 година.
Податоците собрани од Меѓународната организација за миграции (ИОМ) покажуваат дека во текот на летните месеци најголем број мигранти кои преку Западен Балкан се обидуваат да стигнат до Европската Унија бил регистриран токму во Босна и Херцеговина.
Според тие податоци, бројката била нешто над 1.100 лица месечно.
За најголем дел од нив, БиХ не е крајната дестинација. Тие ја користат земјата како транзитна територија и во просек остануваат околу две недели, со цел што побрзо да стигнат до границата со Хрватска и да продолжат кон земјите од Европската Унија.
Граничното подрачје покрај Сава поради својата географска положба претставува една од точките каде што мигрантите се обидуваат да ја преминат границата, а најновата акција покажува дека надлежните служби продолжуваат со засилените контроли и координацијата во овој дел од регионот.
