Српскиот претседател Александар Вучиќ денес објави дека телото на починатиот генерал на војската на Република Српска, Ратко Младиќ, осуден во Хаг за геноцид и воени злосторства, е преземено и треба да пристигне во Србија денес.
Тој додаде дека безбедносните организации проценуваат дека на погребот ќе бидат присутни десетици илјади граѓани и дека државата ќе мора да се погрижи сè да помине непречено.
„Мислам дека семејството ќе испрати точно известување, но колку што знам, телото е преземено и треба да пристигне во Србија доцна попладне“, изјави Вучиќ за новинарите во Чока.
Тој изјави дека синот на Младиќ ќе ја информира јавноста во наредните часови или денови што сака семејството да направи.
„Ќе бидеме таму за да обезбедиме секаков вид логистичка и транспортна поддршка и да го зачуваме јавниот мир и безбедност. Ова е многу тешко да се обезбеди и да се гарантира безбедноста за сите“, рече Вучиќ.
Според него, проценките од Агенцијата за безбедност и информации (БИА), Агенцијата за воена безбедност (ВБА), Агенцијата за воено разузнавање (ВОА) и Министерството за внатрешни работи (МВР) се движат во десетици илјади присутни луѓе на погребот на Младиќ.
„Мораме да обезбедиме сè за самите гробишта, за местото на погребување. Многу, многу тешка работа за нашите служби и ќе ги употребиме сите расположиви сили за да ја обезбедиме безбедноста на сите граѓани“, рече Вучиќ, без да прецизира точно каде ќе биде погребан Младиќ.
