Солун треба да ја надмине улогата на главен град на северна Грција и да се позиционира како економски, транспортен и логистички центар на целиот Балкан, порача грчкиот премиер Киријакос Мицотакис, претставувајќи ја владината стратегија за развој на градот и северниот дел на земјата.
„Солун се трансформира и повторно ја бара својата природна улога, не само како главен град на северна Грција, туку како главен град на Балканот во целина“, рече Мицотакис на форумот за Националната стратегија за регионален и локален развој.
Зад политичката порака стои серија големи инфраструктурни проекти со кои Атина сака Солун да го претвори во главна порта меѓу Медитеранот, Балканот и источна Европа.
Еден од клучните проекти е метрото. Неделава беше пуштено продолжувањето кон Каламарија со уште пет станици, со што мрежата достигна 14,4 километри и 18 станици. Владата веќе ја подготвува следната фаза, проширување кон северозападните делови на градот.
Паралелно се гради и новиот надземен пат Flyover на солунската обиколница, кој според плановите треба да биде пуштен во мај 2027 година и значително да го намали сообраќајниот притисок околу градот.
Особено место во стратегијата има солунското пристаниште. Мицотакис ги посочи инвестициите во пристанишната инфраструктура, железницата и новиот логистички центар во поранешниот воен комплекс Гону како основа Солун да стане влезна точка за стоки кон Балканот и источна Европа.
За Македонија оваа стратегија има директно регионално значење. Солун е најблиското големо медитеранско пристаниште до земјата и еден од главните правци за македонската трговија. Секое подобрување на железничката, патната и пристанишната инфраструктура кон север може дополнително да ја зголеми економската тежина на коридорот Солун-Скопје и неговото продолжување кон Србија и централна Европа.
Грчката влада планира и инвестиции од околу 300 милиони евра за модернизација на автопатот Егнатија во следните две години, кој е еден од клучните транспортни правци низ северна Грција.
Покрај транспортот, Солун треба да се позиционира и како регионален центар за образование, здравство и иновации. Новата детска болница, финансирана од фондацијата „Ставрос Ниархос“, треба да биде завршена во првите месеци од 2027 година, а Мицотакис ја најави како најмодерна детска болница на Балканот.
До 2030 година е планирана и голема реконструкција на просторот на Меѓународниот саем во Солун, со нов конгресен центар и околу 120.000 квадратни метри зелен простор.
Изразот „главен град на Балканот“ е политичка и развојна амбиција, а не формален статус. Но проектите што ги набројува грчката влада покажуваат дека зад пораката стои јасна стратегија: преку пристаништето, железницата, автопатиштата, логистиката, универзитетите и новите инвестиции Солун да стане една од главните економски раскрсници на регионот.
