Министерот за здравство, Сашо Клековски, заедно со директорот на Фондот за здравствено осигурување, Златко Перински, градоначалникот на Штип, Иван Јорданов и претставници на Светска банка, го разгледаа концептот за завршување и целосно опремување на новата Клиничка болница во Штип.
Проектот е проценет на околу 109 милиони евра (6,7 милијарди денари) и предвидува завршување на главниот болнички објект, набавка на современа медицинска опрема и функционално поврзување на сите одделенија.
„Завршувањето на Клиничката болница Штип е долг кон граѓаните на источна Македонија. Сакаме пациентите да добиваат навремена и квалитетна здравствена услуга, а здравствените работници да имаат современи услови за работа“, изјави министерот Клековски.
Новиот регионален здравствен центар ќе опслужува околу 250.000 жители од источниот дел на државата, со што се очекува да се подобри здравствената заштита, да се намали притисокот врз болниците во Скопје и да се создадат подобри услови за задржување на медицинскиот кадар во регионот.
