Околу 30.000 луѓе се евакуирани денес во германскиот град Пфорцхајм, во сојузната покраина Баден-Виртемберг, откако за време на градежните работи беше пронајдена неексплодирана воздушна бомба од Втората светска војна, објавија локалните власти.
Полицијата соопшти дека се очекува бомбата да биде деактивирана подоцна во текот на денот.
Според властите, станува збор за бомба од типот HC-4000 со тежина од 1,8 тони, која содржи околу 1.350 килограми експлозивен материјал.
Според Дојче Веле, иако претходно беше објавено дека бомбата не претставува „непосредна опасност за јавноста“, во градот е воспоставена зона на исклучување од 1,5 километри во дијаметар, додека пожарникарите, полицијата и екипите за деминирање проверуваат дали сите жители ја напуштиле зоната за евакуација.
Градот Штутгарт, кој се наоѓа на околу 40 километри од местото на откривање, не беше директно вклучен во евакуацијата.
