Турскиот парламент усвои закон со кој се забранува користењето на социјалните мрежи од страна на деца под 15 години. Според одлуката, лицата под 15 години нема да можат да отвораат профили на социјалните мрежи, а дигиталните платформи ќе мора да имплементираат системи за проверка на возраста. Социјалните мрежи ќе мора да обезбедат јасни, разбирливи и едноставни алатки за родителска контрола, објави ТРТ Хабер.
Овој потег на Турција доаѓа во време кога низ цела Европа се разгорува дебатата за заштита на младите во дигиталниот простор. Францускиот претседател Емануел Макрон веќе покрена иницијатива за воведување месечен „ден без интернет“, поттикнувајќи ги младите да им се вратат на спортот, читањето и на она што тој го нарекува виталност на реалниот живот. Ваквите апели се вовед во поширок европски координативен состанок каде ќе се разгледуваат слични рестрикции на ниво на целиот континент.
Иницијативата добива силна поддршка и во самиот врв на Европската унија. Претседателката на Европската комисија, Урсула фон дер Лајен, веќе оствари консултации со лидерите на дванаесет земји членки, меѓу кои Германија, Италија и Шпанија, за воведување заеднички стандарди за ограничување на пристапот на децата до социјалните мрежи. Очигледно е дека политичкиот притисок расте, а фокусот се префрла од лична одговорност на родителите кон системска законска регулација на технолошките гиганти.
