Потрагата по Злата Јанкова од селото Орел, општина Свети Николе, сè уште трае. Последен пат е видена на 16 јуни 2024 година околу 15 часот, по што ѝ се губи секаква трага. На социјалните мрежи постојано се објавуваат апели до граѓаните да пријават било какви информации во Министерството за внатрешни работи или на телефонските броеви наведени во апелот.
„Исчезнато е лицето Злата Јанкова, последен пат видена на 16.06.2024 во 15 часот во село Орел – Св. Николе. За било какви информации пријавете во МВР или на 078828477 и 071686952“, стои во објавата.
Иако помина повеќе од една година, семејството не се откажува од надежта дека Злата е жива. Таа е мајка, сопруга и домаќинка, а судбината ѝ останува непозната повеќе од дванаесет месеци.
Сопругот Дејан Јанковски истакнува дека во семејството немало никакви проблеми што би укажувале дека Злата би можела сама да си наштети или да замине. Напротив, таа била целосно посветена на семејството и на воспитувањето на нивните двајца синови. По нејзиното исчезнување, домот е исполнет со тишина и страв, а чувството на празнина станало секојдневие.
Дејан раскажува дека денот кога Злата последен пат била видена бил сосема обичен. По попладневниот одмор тој заминал да работи во пластениците, додека таа тргнала кон домот за да ги заврши секојдневните обврски. По нејзиното заминување од куќата, била забележана од сосетка, што претставува последниот потврден момент кога била видена жива.
И покрај сите активности и напори, потрагата по Злата Јанкова сè уште не дала резултат. Повеќе од една година подоцна, нејзината судбина останува мистерија, а семејството живее без одговори и без чувство дека државата стои цврсто зад нив.
