Претседателот на ЗЕЛС и градоначалник на општина Кисела Вода, Орце Ѓорѓиевски, кој е и кандидат за градоначалник на Скопје, оствари средба со претседателот на Државната изборна комисија, Борис Кондарко, со раководството на ДИК и со извршната директорка на ЗЕЛС, Душица Перишиќ.
На средбата се разговараше за законските обврски на општините во делот на обезбедување соодветни простории за општинските изборни комисии, навремено и непречено преземање на изборните дејствија, како и потребната техничка опременост и сите неопходни услови за нивната работа. Дополнително внимание беше посветено и на обезбедувањето простор за примање, транспорт и чување на изборниот материјал.
,,Се договоривме ЗЕЛС навремено да ги информира општините за преземање на сите потребни активности, со цел граѓаните непречено да го остварат своето право на глас. Како претседател на ЗЕЛС, сакам да нагласам дека заедно со општините стоиме целосно на располагање на ДИК,“ истакна Ѓорѓиевски.
Тој додаде дека заедничка цел е успешно надминување на сите можни предизвици и обезбедување услови за фер, демократски и непречени избори.
