„Ќе се прави ајвар од ананас, така ми се чини“ е една од пораките што деновиве најмногу се споделува на социјалните мрежи. Зад оваа иронија стои сосема реален проблем: зеленчукот, кој треба да биде основен дел од домашната трпеза, станува сè потежок за купување.
Фактор беше на терен за да направи увид во цените, а она што може да се види по рафтовите и тезгите покажува дека револтот кај граѓаните не е без причина. Во еден поголем маркет, доматите се продаваа за 259 денари за килограм, пиперките се движеа до 295 денари, јагодите достигнуваа 269 денари, а крушите 215 денари за килограм. Во помала пилјара, пак, пиперките се движеа и до 300 денари за килограм.
Токму тука граѓаните го поставуваат прашањето што станува сè погласно: како е можно производ што со години се смета за секојдневен и домашен, денес да има цена што за многумина е речиси недостижна? Кога килограм пиперка се продава по цена од околу 300 денари, впечатокот е дека и месото на моменти излегува поевтино од зеленчукот. За многу семејства, тоа веќе не е прашање на избор, туку на пресметка што може да се стави во кошничка, а што ќе мора да се прескокне.
Посебно впечатлива е и споредбата кај компирот. Беровскиот компир достигнува цена и до 35 денари за килограм, додека увозен компир на пазар може да се најде и за 25 денари. Тоа дополнително ја отвора дилемата зошто домашните производи во одделни случаи излегуваат поскапи и од увозните, иако логиката би налагала да бидат подостапни.
Дел од објаснувањата за високите цени се бараат во сезоната, ограничената понуда и трошоците за складирање, транспорт и продажба. Но, за потрошувачите тие објаснувања сè помалку значат кога на крај треба да платат речиси 300 денари за килограм пиперки или над 250 денари за домати. Во такви услови, секое одење во маркет или на пазар сè повеќе личи на проверка на издржливоста на домашниот буџет.
На крај, за граѓаните најмалку е важно какво е формалното објаснување за растот на цените. Тие го гледаат тоа што е пред нив на рафтот и на тезгата. Кога пиперката оди до 300 денари за килограм, доматите до 259 денари, а јагодите до 269 денари, тогаш станува јасно дека зеленчукот веќе не се купува без размислување.
