Љупчо Палевски – Палчо, кој е осуден на доживотен затвор за грабнување и две убиства, преку својот адвокат поднесе жалба до Апелациониот суд во Скопје, со барање за ослободување или повторно судење.
Адвокатот Јовица Страшевски наведува дека во првостепената постапка постоеле сериозни процесни пропусти. „Надоврзавме на доста суштествени повреди во постапката. Дел од доказите воопшто не беа изведени на суд, а сепак се споменати во пресудата. Има и случаи каде што доказ се побива со исказ на обвинетиот, а самиот исказ на обвинет не може да биде доказ. Побаравме јавна седница за дополнително да ги образложиме наодите, бидејќи рокот за жалба беше краток. Бараме или повторно судење, или ослободителна пресуда“, истакна Страшевски.
Предметот е во рацете на судијата Ѓоко Ристов, а мислење е доставено и до Вишото јавно обвинителство. Апелацијата наскоро треба да закаже јавна седница на која ќе се одлучува дали ќе ја потврди, укине или измени првостепената пресуда.
