Иницијативниот комитет што ги поддржува Илијана Јотова и Кирил Влчев денеска ги поднесе нивните кандидатури во Централната изборна комисија на Бугарија за претседателските избори закажани за 25 октомври. Јотова е кандидат за претседател, а Влчев за потпретседател.
Документите во ЦИК ги поднесе Влчев заедно со претставници на иницијативниот комитет. Јотова не присуствуваше на регистрацијата бидејќи патува за Њујорк, каде што треба да учествува на Генералното собрание на Обединетите нации.
За кандидатурата биле доставени повеќе од 9.000 потписи. Иницијативниот комитет за независните кандидатури на Јотова и Влчев претходно беше регистриран од ЦИК на 11 септември, со 149 членови.
По поднесувањето на документите, Влчев рече дека нивната кампања ќе се повикува на пораки од Манифестот со кој во 1908 година е прогласена независноста на Бугарија. Изјавата доаѓа еден ден пред 22 септември, кога земјата го одбележува Денот на независноста.
Како три основни пораки тој ги издвои мирот, припадноста на Бугарија кон „семејството на цивилизираните народи“ и стремежот кон културен и економски напредок.
Јотова на 3 септември го претстави Влчев како свој кандидат за потпретседател. Тој е генерален директор на Бугарската телеграфска агенција и по професија е новинар и правник.
Според Бугарската национална телевизија, до денеска во изборната трка се вклучени 17 кандидатски двојки, а рокот за регистрација истекува на 22 септември.
Претседателските избори во Бугарија ќе се одржат на 25 октомври 2026 година.
