Во неделното интервју за РСЕ, градоначалникот на Скопје Орце Ѓорѓиевски најавува дека постапките на терен за БРТ-проектот ќе почнат во 2027 година, а претходно ќе има набавка на над 100 нови автобуси за обнова на јавниот превоз. Уверува дека проблемот со кучињата скитници ќе биде значително намален, а новиот Луна парк, според него, ќе биде забавен простор за сите генерации.
За БРТ-то, прво ми е многу драго што конечно со ЕБОР го откочивме процесот. Тоа беше макотрпна работа изминативе повеќе од три месеци, колку што сум градоначалник во градот Скопје. Верувам дека некаде втората половина на оваа календарска година ќе започнеме со тендерирање на таа постапка. Тоа е сериозен проект за градот Скопје којшто генерално ќе ги среди овие гужви коишто ги имаме сообраќајни, а се поврзани со делувањето на автобусите во трасите во моментов во градот Скопје. Од друга страна, пак, како што знаете дека обезбедуваме повеќе од 30 нови автобуси преку овој проект. Што значи дека, јас верувам, некаде најдоцна на почетокот на наредната календарска година би почнале со градежните активности и би почнале со работа на терен.
