Товарен воз излета од шините во Архангелската област, во северозападна Русија, откако се урна дел од железнички мост, соопштија Руските железници и локалните власти. Инцидентот предизвика големи прекини во железничкиот сообраќај.
Гувернерот на Архангелската област, Александар Цибулски, изјави дека несреќата се случила околу 5:10 часот по локално време, кога се урнал дел од железничкиот мост над реката Вилед, поради што неколку товарни вагони излетале од шините.
Во инцидентот нема повредени, но најмалку осум патнички возови на долги релации, вклучително и оние што поврзуваат големи градови како Москва и Санкт Петербург, останале блокирани.
Руските железници испратиле автобуси за превоз на патниците, како и екипи за санација на оштетениот мост. Засега не е познато колку долго ќе биде прекинат сообраќајот, а полицијата ги истражува причините за уривањето.
Неколку часа по инцидентот, украинската диверзантска група „Атеш“ објави порака на Телеграм во која ги исмева руските власти.
„Мостови нема да се уриваат само во Архангелската област. Набљудуваме… И веднаш ќе ги претркаме бирократите на Путин и нивните објаснувања: секако, сето ова се случува ‘случајно’, исклучиво поради технички дефекти“, соопшти групата.
Сепак, групата не презеде одговорност за уривањето на мостот. Според руските власти, вагоните биле празни и немало истекување гориво.
