Поранешниот претседател на Косово и некогашен командант на Ослободителната војска на Косово (ОВК), Хашим Тачи, денеска е неправосилно осуден на 17 месеци затвор поради обид за влијание врз сведоци за време на судењето за воени злосторства. Во септември веќе беше осуден на 25 години затвор.
Специјализираните совети на Косово во Хаг го прогласија 58-годишниот Тачи за виновен за обид за попречување службени лица во извршувањето на нивните должности, прекршување на тајноста на постапката и непочитување на судот. Новата казна мора да ја издржи одделно од казната изречена за воени злосторства.
Од затвор давал инструкции како треба да сведочат сведоците
Судот утврдил дека Тачи во текот на 2023 година на посетителите во притворот во Хаг им откривал доверливи информации за сведоците на обвинителството. Преку поранешни соработници се обидувал да влијае врз нивните искази во постапката во која му се судело за воени злосторства.
Обвинителката Кимберли Вест во завршниот збор предупредила дека Тачи „во повеќе наврати и систематски се обидувал да влијае врз исказите на сведоците“. Според обвинителството, на поранешните соработници им давал инструкции што требало да им ги пренесат на сведоците, пишува АФП.
Судот утврдил дека Тачи на еден соработник му дал инструкции за сведокот Рустем Мустафа, вклучително и да негира пред обвинителството дека имал контакт со него. На друг соработник му предал писмени инструкции за сведочењето на Бислим Зирапи, кои полицијата подоцна ги пронашла.
Во септември осуден на 25 години затвор
Специјалниот суд во Хаг на 16 септември ги прогласи Тачи и уште тројца поранешни лидери на ОВК за виновни за воени злосторства извршени за време на конфликтот во Косово во 1998 и 1999 година. Пресудата опфаќа незаконски притворања, сурово постапување, мачења и убиства.
Тачи и Јакуп Красниќи беа осудени на по 25 години затвор, Кадри Весели на 18, а Реџеп Селими на 13 години. Судот истовремено ги ослободи од обвиненијата за злосторства против човештвото, бидејќи не било докажано постоење на широко распространет или систематски напад врз цивили.
Септемвриската пресуда предизвика силни реакции меѓу косовските Албанци, од кои дел и понатаму го сметаат Тачи за херој на борбата за независност.






