Едно лице загина, а четворица други се повредени во пукање што се случи во петокот наутро, на 23 октомври, во француските градови Трап и Ла Вериер, во департманот Ивелин, во близина на Париз.
Маж отворил оган од возило на улица; меѓу повредените има и дванаесетгодишно девојче.
Според информациите објавени од францускиот медиум BFMTV, напаѓачот прво отворил оган во Трап, кај автобуската станица „Ван Гог“, потоа се упатил кон плоштадот „Луј Перго“, а подоцна и кон бензинската пумпа „Есо“ на улицата „Мартин Лутер Кинг“. Во тој дел биле ранети две лица, од кои едното подоцна им подлегнало на повредите.
Потоа, напаѓачот се упатил кон блискиот град Ла Вериер, каде што продолжил да пука во близина на аптека и на улицата „Марсел Ривиер“. Во тој дел биле повредени уште три лица, меѓу кои и едно дванаесетгодишно дете.
Загинатиот маж имал 26 години, додека четворица други поединци се здобиле со сериозни повреди, потврдија полициски извори за француската телевизија BFM.
Осомничениот, кој има 39 години, е уапсен во блискиот град Кониер од страна на Бригадата за борба против криминалот (BAC). Тој е задржан во притвор.
Според BFMTV, осомничениот е идентификуван како Кевин Т. Случајот го презеде француското Национално обвинителство за борба против тероризмот (PNAT). Мотивот за нападот сè уште не е познат, а францускиот министер за внатрешни работи, Лоран Нуњез, изјави дека инцидентот наликува на „убиствен поход“.
Нуњез напомена дека мотивот на напаѓачот останува непознат, но потврди дека е известено обвинителството за борба против тероризмот – детал што го оцени како значаен, без да наведе дополнителни поединости.
Али Рабе, градоначалникот на Трап, изјави за BFMTV дека напаѓачот „јасно сакал да предизвика масакр“, објаснувајќи дека пукал неселективно и дека инциденти со пукање се случиле на повеќе локации низ градот. Францускиот премиер Себастиен Лекорну го осуди инцидентот, опишувајќи ги настаните како „многу сериозни“ и изјави дека сите безбедносни служби и правосудни органи се целосно мобилизирани.
Францускиот претседател Емануел Макрон изрази длабок шок во врска со пукањата во Трап и Ла Вериер.
Во објава на социјалната мрежа „Икс“, тој наведе дека неговите мисли се со жртвите, нивните семејства и сите жители на департманот Ивелин, додавајќи дека нацијата стои покрај нив во овие тешки моменти. Тој, исто така, им се заблагодари на безбедносните сили кои успеаја да го уапсат осомничениот, пренесе „Телеграф“.
