Албанскиот премиер Еди Рама изјави дека бил неутрализиран дрон со експлозив, со кој, според неговите тврдења, било планирано да се нападне зградата на албанската Влада во Тирана и да се предизвика пожар во внатрешниот двор.
„Пред два дена беше неутрализиран дрон со експлозив со кој се планирало да се погоди зградата на Владата и да се запали внатрешниот двор“, изјави Рама во обраќање во живо на својата страница на Фејсбук.
Албанскиот премиер нагласи дека, според него, ниту еден студент не би помислил да спроведе ваков план, додавајќи дека во случајот е вмешана „странска рака“.
Рама оцени дека зад протестите во земјата стои странско влијание, притоа директно споменувајќи ја можната вмешаност на Иран. Сепак, во објавените информации не се наведени дополнителни детали за потеклото на дронот, ниту докази за наводната поврзаност со странски фактори.
Во Тирана со денови траат судирите меѓу полицијата и демонстрантите, при што се регистрирани палење и уништување имот, како и повредени лица.
Рама претходно го осуди, како што го нарече, влијанието на „странски раце“ во протестите, тврдејќи дека нивната цел е да се попречи пристапувањето на Албанија во Европската Унија.
Засега, наводите за планираниот напад со дрон и за евентуалната странска вмешаност се изјави на албанскиот премиер, а во објавениот извештај не се наведени независна потврда или дополнителни информации од надлежните институции.
