Францускиот остров Олерон е потресен од ужасен инцидент. Според француските медиуми, маж намерно удрил со своето возило во група пешаци и велосипедисти, повредувајќи најмалку десет лица, од кои неколку се во критична состојба. Осомничениот по нападот се обидел да го запали својот автомобил и извикувал „Алаху Акбар“ при апсењето, потврди обвинителството во Ла Рошел.
Возилото нагло свртило кон група луѓе, директно насочувајќи се кон пешаци и велосипедисти, пред возачот да го запре автомобилот и да се обиде да го запали.
Полициските сили реагирале брзо и го уапсиле осомничениот на лице место. Човекот активно се спротивставил, што ги принудило полицајците да употребат електрошок. Извикот „Алаху акбар“, што осомничениот го повторил за време на интервенцијата, дополнително ја зголемила тревогата кај силите на редот.
Кристоф Сиор, градоначалник на Сен-Пјер-д’Олерон, се обрати до јавноста на BFMTV:
„Ова е неопислив шок за нашата заедница. Невини луѓе кои само пешачеле или возеле велосипед беа нападнати. Нашите мисли се со повредените и нивните семејства.“
Обвинителството во Ла Рошел отвори истрага за обид за убиство, додека Националното обвинителство за борба против тероризмот (ПНАТ) го презеде случајот, што укажува на можна терористичка позадина. Идентитетот на осомничениот сè уште не е официјално објавен, а мотивите за нападот остануваат непознати. Меѓу повредените има возрасни и деца, а неколку жртви во тешка состојба се однесени во болниците во блиските градови Ла Рошел и Поатје.
Францускиот претседател Емануел Макрон, кој беше на пат кон Бразил, ја следел ситуацијата на островот, дознава BFMTV од извори блиски до шефот на државата.
Островот Олерон се наоѓа во Атлантскиот Океан на многу мала оддалеченост од копното. Со 174 км² е втор по големина европски француски остров, по Корзика. Има население од 21 илјада жители.
