Home » Знаењето за Холокаустот се намалува

Знаењето за Холокаустот се намалува

by Журнал.мк

Пред 80 години беше ослободен логорот Аушвиц-Биркенау. Денес, знаењето за нацистичката ера и Холокаустот постојано се намалува. Незанењето е особено големо кај помладите луѓе, покажува една неодамнешна студија.

27 јануари е Меѓународен ден на сеќавање на жртвите од Холокаустот. Тој потсетува на ослободувањето на најголемиот концентрационен логор на нацистите Аушвиц-Биркенау во 1945 година. Колку е важно ова редовно сеќавање на убиствата на милиони Евреи уште еднаш покажа и неодамна објавеното истражување на Конференцијата за еврејски материјални барања против Германија (ги претставува Евреите во преговорите за компензација и реституција за жртвите на нацистичкиот прогон и нивните наследници, н.з.)

Според студијата, дванаесет проценти од младите возрасни лица во Германија на возраст меѓу 18 и 29 години никогаш не слушнале за термините „Холокауст“ или „Шоа“. Во други земји, процентот е уште поголем: во Австрија – 14 отсто, во Романија – 15 отсто, а во Франција дури 46 отсто од младите. Во групата на сите возрасни бројките се помали: во Германија пет отсто од испитаниците дале одговор дека не слушнале за тие термини, во Франција – 22 отсто.

Размерите на Холокаустот честопати непознати

За истражувањето биле интервјуирани 1.000 луѓе во осум земји: Германија, Франција, Австрија, Велика Британија, Полска, Унгарија, Романија и САД. Насекаде, процентот на млади луѓе кои не знаеле колку Евреи биле убиени за време на нацистичката ера е голем. Во Германија тој број е 40%, додека 15 отсто сметаат дека бројот на убиени е два милиони или помалку. Вистинскиот број на убиени Евреи е шест милиони. Во другите земји, знаењето е уште помало: на пример, 65 отсто од младите на возраст од 18 до 29 години во Франција ги потцениле размерите на Холокаустот, а во Романија тоа е случај со 70 отсто од испитаниците во таа возрасна група.

Значително помал број млади луѓе целосно го негираат Холокаустот: два отсто од Германците и Полјаците на возраст од 18 до 29 години се согласиле со изјавата дека Холокаустот „е мит и не се случил“. Во Романија овој број е највисок – 15 проценти.

Секој четврти млад возрасен во Германија не може да именува ниту еден концентрационен или логор изграден од нацистите. Во групата на сите возрасни, овој број е 18 проценти. Во САД речиси половина (48 отсто) од анкетираните Американци не го знаеле името на ниту еден логор или гето, во Австрија тој број е десет отсто, а во Полска седум проценти.

Загриженост од можно повторување на злосторствата

Речиси во сите анкетирани земји, големо мнозинство верува дека нешто како Холокаустот денес може да се случи повторно. Загриженоста е најголема во САД и Велика Британија, каде што 76 отсто, односно 69 отсто, од испитаниците изразиле ваков страв. Во Германија тоа го направиле 61% од испитаниците..

Потребни се повеќе информации и едукација

Со оглед на резултатите од истражувањето, Ридигер Мало, европски претставник на Конференцијата за еврејски материјални барања, побара од сите влади во Европа поголема едукација за Холокаустот. И претседателот на Централниот совет на Евреите во Германија, Јозеф Шустер, нагласи: „Загрижувачкиот пораст на антисемитското вербално и физичко насилство што го гледаме во Германија има свои корени во голема мера во дезинформациите и недостатокот на информации за Холокаустот.“ Политиката, образованието и медиумите мора да работат заедно за да се спротивстават на ова.

Ова барање има поддршка и од огромно мнозинство од испитаниците: во сите земји каде што е спроведено истражувањето, најмалку девет од десет возрасни сметаат дека е важно да се продолжи со едукација на луѓето за Холокаустот „за тој да не се повтори“.

You may also like

This website uses cookies to improve your experience. We'll assume you're ok with this, but you can opt-out if you wish. Accept Read More

About Us

Журнал МК е независен информативен портал.

Адреса: 8 Ударна Бригада 20б, Скопје, МК
Телефон: + 389 2 3217 815
Email: info @ zurnal.mk

@2022 – All Right Reserved. Designed and Developed by Anet.com.mk