Пократките денови и престојот во затворени простории ја намалуваат изложеноста на сонце, што може да доведе до недостаток на витамин Д. Овој витамин е многу важен за одржување на здрави коски, поддршка на имунолошката функција и регулирање на расположението. Иако еден начин да се добие витамин Д е да се поминува време на сонце, нутриционистката Стефани Шиф од болницата Нортвел Хантингтон за “New York Post” истакнува дека тоа не е единствениот начин.
Таа за порталот ги издвоила најпознатите показатели за недостаток на витамин Д, кој може да се провери преку тест на крвта и се јавува на подолг временски период. Некои од симптомите се:
– Болка во коските и зглобовите: Недостатокот на витамин Д може да предизвика омекнување на коските, што го зголемува ризикот од фрактури и болка.
– Мускулна слабост и грчеви: Слично на „болки во растење“, овие симптоми може да вклучуваат и неконтролирано грчење на мускулите.
– Проблеми со забите: недоволно витамин Д може да ја намали апсорпцијата на калциум, предизвикувајќи расипување на забите, заболување на непцата и гингивитис.
– Губење на косата: Ниските нивоа на витамин Д се поврзани со различни форми на губење на косата, вклучувајќи телоген ефлувиум (губење поврзано со стрес), андрогена алопеција (наследна губење на косата) и алопеција ареата (ќелави дамки).
– Апетит и проблеми со спиењето: Ниското ниво на витамин Д може да предизвика замор, тешкотии со спиењето и да го наруши апетитот бидејќи учествува во регулацијата на хормоните мелатонин и лептин.
Како да го зголемите нивото на витамин Д?
Храната како што се масна риба, жолчки од јајце, сирење и путер се природни извори на витамин Д, додека некои производи, како што се житарките за појадок и пијалоците од растително потекло (бадем, соја, овесно млеко), често се збогатени со овој витамин.
Доколку одлучите да земате суплементи, важно е да се придржувате до препорачаната дневна доза. „Премногу витамин Д може да предизвика токсичност, што доведува до симптоми како што се гадење, слабост, често мокрење и проблеми со бубрезите“, предупредува Шиф, пренесува “New York Post”.
