Извршниот директор на Меѓународната агенција за атомска енергија, Рафаел Гроси, извести дека иранскиот нуклеарен објект Фордо претрпел сериозни оштетувања по воздушните напади извршени од страна на САД.
На теренот се забележани кратери, што укажува на тоа дека при нападите биле употребени пробојни бомби. Деталната проценка на подземните штети сѐ уште не е можно да се изврши, бидејќи објектот е длабоко вкопан во планински предел.
Гроси апелираше до иранските власти итно да дозволат инспекции на местото на нападите, нагласувајќи дека инспекциските тимови на агенцијата се подготвени веднаш да реагираат. Фордо е еден од трите ирански нуклеарни објекти што беа цел на американски воздушни напади во контекст на засилената конфронтација поврзана со иранската нуклеарна програма.
