На територија на Општина Пробиштип е забележено труење на бездомни животни и домашни миленици. Градоначалникот на Општина Пробиштип, Тони Тоневски, го осудува овој настан и посочи дека случајот е пријавен во полициска станица.
– Ние, како институција, ги викнавме оштетените луѓе, кои дојдоа на разговор. Ги информиравме претставниците на Министерството за внатрешни работи, постапката, т.е. истрагата е во тек за да се пронајде непознатиот сторител и би апелирал до сите да се воздржат од какви било инциденти, бидејќи ние, како Општина, имаме план како да ги решиме проблемите што ги имаме со бездомните кучиња – рече Тоневски.
Тој истакна дека проблемот со бездомните животни ќе се решава на ниво на регион, односно Советот на градоначалници на Источнопланскиот Регион веќе има аплицирано за добивање средства за изградба на регионален стационар, во кој ќе бидат згрижени бездомните животни.
Општина Пробиштип оваа година на граѓаните првпат им нуди и субвенции за стерилизација на домашните миленици.
