Нови функции кои WhatsApp ги тестира во бета верзијата на својата апликација ќе бидат достапни за сите корисници во следните недели
WhatsApp тестира неколку нови функции за гласовни и видео повици. Новитетите се откриени во бета верзијата на апликацијата за Android (2.25.10.16), а според информациите од порталот WABetaInfo, дел од корисниците веќе неколку дена ги тестираат.
Имено, една од новите функции е можноста за исклучување на микрофонот за време на дојдовен гласовен повик директно од лентата со известувања. Во пракса, тоа би значело дека корисниците можат да одговорат на повик, а притоа нивниот микрофон да остане исклучен. Иако е малку нејасно колку оваа опција навистина ќе биде корисна, би можела да биде од помош во бучни средини.
Втората нова функција се однесува на видео повиците. WhatsApp им овозможи на корисниците да ја исклучат камерата пред да одговорат на повик, што може да биде корисно за оние на кои им треба малку време, на пример, да се облечат или да преминат во друга просторија пред почетокот на разговорот. Како дополнителен слој на приватност, камерата воопшто нема да се вклучи на почетокот кај видео повици од непознати броеви.
Што се однесува до третата нова функција, таа им овозможува на корисниците за време на видео повици да ги изразат своите емоции преку реакции со емотикони.
