Врачена наградата за најдобра поема за 2021 година на лауреатот Трајче Кацаров. На манифестацијата „Прличеви беседи“ во НУ-ЦК „Глигор Прличев“ во Охрид, директорот на установата му ја врачи награда откако претходно жири – комисијата ја прогласи за најдобра поемата „Цветко“ под шифра „Когито“. Кацаров имаше свое излагање и појаснување за поемата, која е создадена по принципите на античките дела.
Наградената поема „Цветко“ ја третира вечната тема за човековата ранливост и минливост, (не)исполентоста на очекувањата во дослух со самиот себеси, но и со традицијата, менталитетот, обичаите карактеристични за поднебјето под кое живееме, каде низ слободен стих се движи содржината на случувањата во ритам и стилска одржливост со помош на едноставен јазик, ставен во функција на пораката која треба да ја пренесе.
За наградите одлучуваше жири – комисијата во состав на проф. д-р Маја Јакимовска-Тошиќ – претседател, проф. д-р Мишел Павловски и д-р Славчо Ковилоски, која едногласно ја донела одлуката.
Кацаров е поет, раскажувач, есеист, колумнист и драмски автор од Штип. Со своето обемно и преведувано творештво досега е овенчан со неколку значајни награди како Рационвото признание во 2009 година, Прозни мајстори и други.
