Home » Во Црна Гора уапсен поранешниот специјален обвинител

Во Црна Гора уапсен поранешниот специјален обвинител

by Журнал.мк

По наредба на Специјалното обвинителство на Црна Гора, рано утрово се уапсени поранешниот главен специјален обвинител Миливое Катниќ и поранешниот висок полициски функционер Зоран Лазовиќ.

-Катниќ и Лазовиќ се лишени од слобода поради постоење основи на сомнение дека ги сториле кривичните дела создавање криминална организација и злоупотреба на службената положба, соопшти портпаролот на Специјалното обвинителство.

Тој наведе дека апсењето на поранешниот шеф на Специјалното обвинителство и поранешниот помошник директор на полицијата е врз основа на соработката на обвинителството со ЕУРОПОЛ, Агенцијата на Европската унија за соработка во спроведувањето на законот.

-Во тек е претрес на нивните станови и други простории во Подгорица, Цетиње, Будва и Бијело Поље, заради пронаоѓање на траги од кривичното дело и предмети кои можат да бидат корисни за постапката, изјави обвинителот Радоњиќ.

Тој додаде дека Катниќ и Лазовиќ ќе бидат однесени на распит кај специјалниот обвинител во законскиот рок.

Миливое Катниќ беше главен специјален обвинител од 2015 година, а на таа функција дојде од местото судија на Апелациониот суд. Тој беше разрешен на почетокот на 2022 година, година и пол по смената на власта во Црна Гора, а Демократската партија на социјалистите (ДПС) премина во опозиција по триесет години владеење.

Новите власти го обвинија Катниќ дека ја прогонува опозицијата и ги штити највисоките функционери на ДПС, вклучително и долгогодишниот претседател Мило Ѓукановиќ.

Тој беше главен обвинител во случајот за обид за тероризам и „државен удар“ во 2016 година, во чие обвинение беа вклучени руски и српски државјани, како и лидерите на прорускиот Демократски фронт – актуелниот претседател на Парламентот на Црна Гора Андрија Мандиќ и пратеникот Милан Кнежевиќ, претседател на Демократската народна партија, член на владејачката коалиција.

Поранешниот помошник директор на полицијата Зоран Лазовиќ е долгогодишен полициски функционер одговорен за борбата против организираниот криминал. Неговиот син Петар Лазовиќ е во притвор повеќе од година и пол бидејќи е осомничен за шверц на дрога и оружје како и припадност на една од криминалните организации во Црна Гора.

Петар Лазовиќ е поранешен вработен во Националната агенција за безбедност, а неодамна понуди кауција од речиси 10 милиони евра за ослободување. Судот ја одби понудената кауција.

Во претходните две години, Црногорското обвинителство спроведе серија апсења на поранешни раководители на правосудни институции и полиција.

You may also like

About Us

Журнал МК е независен информативен портал.

Адреса: 8 Ударна Бригада 20б, Скопје, МК
Телефон: + 389 2 3217 815
Email: info @ zurnal.mk

@2022 – All Right Reserved. Designed and Developed by Anet.com.mk

This website uses cookies to improve your experience. We'll assume you're ok with this, but you can opt-out if you wish. Accept Read More