Висок воен функционер на НАТО во понеделникот ги повика компаниите да бидат подготвени за воено сценарио и соодветно да ги приспособат нивните производни и дистрибутивни линии, за да ги направат помалку ранливи на уцени од земји како Русија и Кина.
„Ако можеме да обезбедиме дека сите клучни услуги и стоки можат да бидат испорачани без разлика на се, тогаш тоа е клучен дел од нашето одвраќање“, рече претседателот на воениот комитет на НАТО, холандскиот адмирал Роб Бауер, во Брисел, според Фена.
Говорејќи на собирот на аналитичкиот центар за европски политики, тој го опиша одвраќањето како надминување на самите воени способности, бидејќи сите достапни инструменти можат и ќе се користат во војна.
„Го гледаме тоа со зголемениот број саботажи, а Европа го виде со снабдувањето со енергија“, рече Бауер.
„Мислевме дека имаме договор со Гаспром, но всушност имавме договор со господинот Путин. Истото важи и за инфраструктурата и стоката во кинеска сопственост. Ние всушност имаме договор со Кси“, рече тој.
Зависност од Кина
Бауер ја истакна зависноста на Западот од испораките од Кина, каде што се произведуваат 60 отсто од сите ретки метални материјали, а 90 отсто се обработуваат. Тој рече дека хемиските состојки за седативи, антибиотици, антиинфламаторни лекови и лекови за низок крвен притисок исто така доаѓаат од Кина.
„Ние сме наивни ако мислиме дека Комунистичката партија никогаш нема да ја искористи таа моќ. Бизнис лидерите во Европа и Америка мора да разберат дека комерцијалните одлуки што ги носат имаат стратешки последици за безбедноста на нивните земји“, нагласи Бауер.
„Компаниите мора да бидат подготвени за воено сценарио и соодветно да ги приспособат своите производни и дистрибутивни линии. Затоа што иако војската е таа која ги добива битките, економијата е таа што ги добива војните“, рече холандскиот адмирал, според Ројтерс.
