Во моделот се искористени над 340.000 парчиња Lego Technic и 768 Lego мотори.
Lego McLaren P1 во размер 1:1 се состои од 342.817 поединечни парчиња Lego Technic, користејќи 393 различни форми на коцки, вклучувајќи 11 направени специјално за оваа градба. Надворешноста е составена од флексибилни парчиња за да се добие заоблената форма, но и да се задржи цврстината при возење.
Моделот се напојува со 768 Lego мотори спакувани во осум моторни пакети. Покрај малите батерии, се користи и голема батерија за потребниот опсег од еден круг околу Silverstone. McLaren не сподели детали за шасијата, но според она што можеме да го видиме на видеото, сè освен тркалата, инструмент таблата и воланот се Lego делови.
„Откако работев на оригиналната програма P1 за McLaren, неверојатно е да се видат толку многу елементи од оригиналот оживеани од тимот на Lego Technic“, рече Ben Gulliver, директорот за тест и развој во McLaren. „Автомобилот беше икона на своето време. Се надевам дека преку оваа соработка со LEGO Group, ќе можеме да ја инспирираме следната генерација дизајнери и инженери да ги поместат границите на автомобилската иновација“.
