Фудбалерите на Барселона синоќа го совладаа тимот на Рајо Ваљекано со 1:0 во 24. коло од шпанската Ла Лига.
Стрелец на единствениот гол за Барса беше Роберт Левандовски од пенал, а со овој триумф Каталонците се вратија на врвот на табелата со 51 бод, исто колку и Реал Мадрид, додека Атлетико има 50, па до крајот ги чека жестока битка за титулата.
Од првата минута на теренот беше феноменалниот Ламине Јамал во дресот на Барселона, соборувајќи уште еден рекорд.
Вчерашниот натпревар беше негов 100-ти во професионалната кариера, а ова момче се уште има само 17 години.
Ја достигна бројката од 100 одиграни натпревари пред најголемите имиња на светскиот фудбал – Лионел Меси, Кристијано Роналдо, Килијан Мбапе…
За Барселона одигра 83 натпревари, а за шпанската репрезентација 17. Ова се навистина импресивни бројки за играч кој во јули ќе наполни 18 години.
Јамал игра во одлична форма оваа сезона. Тој започна 30 натпревари за Барселона во сите натпреварувања, постигнувајќи 11 гола и додавајќи 14 асистенции.
