Home » Таравари на средба со членовите на Собранието на АА

Таравари на средба со членовите на Собранието на АА

by Журнал

Продолжуваат тензиите во Алијансата за Албанците кои кулминираа по објавата на лидерот на партијата Арбен Таравари дека на изборите ќе се приклучат кон албанскиот опозициски блок. Од друга страна поранешниот партиски челник Зијадин Села и дел од раководството и од пратениците на АА, сметаат дека партијата треба самостојно да настапи на изборите и го обвинија Таравари дека тој како поединец не може да одлучува за чекорите на партијата, туку партиските тела.

Таравари доби поддршка од министрите за здравство и за информатичко општество и администрација, Фатмир Меџити и Азир Алиу, по што крилото на Села во кое е и министерот за правда Кренар Лога побара нивна смена и за нови министри во техничката Влада ги предложи Илир Демири и Наим Бајрами.

Таравари за денеска во Куманово закажа консултативна средба со членовите на Собранието на партијата.

– Во 19 часот во Куманово ќе одржам консултативен состанок со делегатите на Собранието на партијата, потврди Таравари за МИА.

Преку официјалниот мејл на Алијанса за Албанците, зад кое стои крилото на Села кој е претседавач на Собранието, пак, беше соопштено дека ова партиско тело, согласно статутот на партијата, е закажано за в сабота во Буши ресорт во 13 часот, а не во Куманово.

-Дел од членовите на Собранието на Алијансата за Албанците во текот на вчерашниот ден добиле порака за средба во градот Куманово, а потоа и за средба со претседателот на Алијансата на Албанците, Арбен Таравари. Она што сакаме да ве известиме е дека никој не треба да подлегне на дезинформации дека се одржува партиско собрание, бидејќи како што ќе заклучите од поканата, станува збор за собир и состанок. Партиското собрание, согласно статутот на партијата, е закажано за в сабота во Буши ресорт во 13:00 часот, се наведува во соопштението.

Пратеникот на АА, Халил Снопче, во изјава за електронското издание на весникот на албански јазик „Лајм“ вели дека ќе се соберат во Куманово за да ја потврдат поддршката за Таравари. Според него, Централното собрание на партијата закажано за в сабота нема да има кворум и потенцира дека ќе биде само еден партиски митинг.

-Ние ќе се собереме во Куманово и ќе ја потврдиме поддршката за Таравари. Политичката поддршка Таравари ја има, бидејќи го има апсолутното мнозинство на делегатите на Собранието на партијата и само ќе се потврди технички и формално оваа политичка поддршка што господин Таравари ја има добиено од делегатите на Собранието на партијата. Ќе се потврди дека мнозинството на Собранието на партијата стојат зад Таравари и мнозинството ќе учествуваат во Куманово, каде ќе се демонстрира силната поддршка за Таравари. Во сабота нема да има ниту кворум. Во сабота може да се одржи само еден партиски митинг, рече Снопче.

Несогласувањата меѓу Таравари и Села настанаа откако партискиот претседател без да го консултира претседателот на партиското Собрание замина во Приштина со лидерите на партиите на албанскиот опозициски блок Европски сојуз за промени на средба со албанскиот премиер Албин Курти, но и потоа откако се повеќе стануваше извесно дека Таравари планира коалицирање на престојните избори со албанските опозиционери.

Кадровската комисија на АА завчера побара од техничкиот премиер Талат Џафери разрешување на министерот за информатичко општество и администрација Азир Алиу и министерот за здравство Фатмир Меџити, поради, како што наведоа, нивното користење на моќта на министерската функција, но без партиска позиција, за да спроведуваат дејствија кои се во спротивност со етичкиот кодекс, вклучително и уцени и притисоци врз членовите на АА и вработените, како и јавно кокетирање со ВМРО-ДПМНЕ.

Алиу и Меџити, во вторникот вечерта на прес-конференција пред Владата, изјавија дека немаат намера да поднесат оставка и дека според нив партијата е единствена, има легитимни органи и легитимен претседател.

Следуваше партиско соопштение во кое беше истакнато дека Управниот совет на Алијансата за Албанците со 5 гласа од 7, едногласно одлучило за нов министер за здравство да го прдложи Илир Демири, актуелен директор на Клиничка болница -Тетово, а за министер за информатичко општество и администрација Наим Бајрами, магистер по политички науки.

Техничкиот премиер Талат Џафери во интервју за МИА изјави дека ја следи ситуацијата во АА, која има тројца министри во владиниот состав, и дека ќе постапи согласно неговите надлежности. Тој вели дека нема да се раководи од Фејсбук статуси, туку дека членовите на Владата од оваа партија ќе треба официјално по институционална линија да се изјаснат во ситуација кога имаат спротивставени ставови дали имаат чувство на припадност на овој состав или не.

-Во принцип знаете многу одамна сум кажал не сум политичар од Фејсбук, сходно на тоа не сум премиер кој се раководи со изјави по Фејсбук или на партиски активности. Јас сум премиер на оваа Влада и соодветно ќе треба да се изјаснат, официјално, членовите на Владата во ситуација кога имаат спротивставени ставови, да се изјаснат по институционална линија дали имаат чувство на припадност на овој состав или не. Не можам да се раководам по она што се случува по телевизии и по конференции партиски, изјави Џафери во интервјуто за МИА.

Првиот вицепремиер Бојан Маричиќ вели дека во ингеренции на Џафери е да процени какви се сигналите од Алијанса за Албанците и какви се ставовите, и согласно тоа, како и од бројките во Собранието, ќе зависи исходот со министрите од АА.

– Ова е Влада што обединува повеќе партии. Доколку премиерот процени, ќе побара нивно разрешување. Важно е, нормално, кого поддржуваат партиите и како, бидејќи Владата се составува врз основа на волјата на партиите. Но, ако Алијанса влегла во техничката Влада затоа што била дел од мнозинството и ги задржала истите места како што била дел во мнозинството, тогаш треба и така и очекуваме да се постапи. Доколку Алијанса, или дел од Алијанса го промениле мислењето, тоа сепак зависи од внатрепартиските одлуки, ќе треба исто така да се изјаснат, многу е тешко да имате двојна позиција во исто време, изјави Маричиќ по вечаршната средба со пратеници од германскиот Бундестаг.

За случувањата во АА и можните последици врз техничката Влада која треба да го подготви изборите, вчера се огласи и поранешниот премиер и лидер на СДСМ Димитар Ковачевски.

– Техничката влада кај нас е светски феномен, што не постои никаде во свет и сметам дека би бил уште еден светски феномен влада што е задолжена за да организира избори ако успее да падне, изјави Ковачевски.

Сепак, смета дека тоа нема да се случи и техничката Влада ќе успее нормално да ги менаџира работите и да организира фер и демократски избори.

You may also like

About Us

Журнал МК е независен информативен портал.

Адреса: 8 Ударна Бригада 20б, Скопје, МК
Телефон: + 389 2 3217 815
Email: info @ zurnal.mk

@2022 – All Right Reserved. Designed and Developed by Anet.com.mk

This website uses cookies to improve your experience. We'll assume you're ok with this, but you can opt-out if you wish. Accept Read More