Британската морнарица развива тајно оружје кое користи вештачка интелигенција за следење на руски подморници.
Технологија првично развиена за следење на китови ќе биде инсталирана на подводни дронови кои ќе ги штитат британските води од поморски закани, објави британскиот „Тајмс“.
Министерството за одбрана чува акустични снимки од непријателски бродови и подморници, собрани во текот на 56-годишната работа на сонарните техничари во британската морнарица.
Тие податоци сега ќе бидат внесени во напреден систем кој користи вештачка интелигенција за да помогне во пронаоѓањето на руски подморници и осветлувањето на океаните. Новиот систем, наречен „Лура“, користи автономни мини-подморници кои можат да останат под вода со месеци.
Подморниците ќе анализираат звуци и ќе идентификуваат закани, објави „Тајмс“. Системот „Лура“ е способен да разликува бродови од иста класа благодарение на разликите во нивните акустични потписи.
Мрежа на подводни сензори
„Лура“ ќе користи мрежа од подводни сензори, слични на сателити, за собирање податоци и анализа на звуци, што ја намалува потребата од човечка анализа и ги забрзува одговорите. На овој начин, Британската морнарица може побрзо да детектира закани и да реагира за да го заштити брегот.
Благодарение на големиот број подводни дронови, Морнарицата ќе може да ги следи водите и да идентификува руски бродови што се упатуваат кон Велика Британија или во близина на подводни кабли, кои се клучни за меѓународните комуникации, истакнува „Тајмс“.
Компанијата „Хелсинг“, која го развила системот, е ангажирана од Британската морнарица да истражи примена на вештачка интелигенција за акустично следење. Се очекува системот наскоро да биде во употреба.
Поранешната инженерка на Британската морнарица, Амелија Голд, изјави дека на морнарите им се потребни многу години обука за да го совладаат препознавањето на подморничките звуци.
