Home » Свечена заклетва на триесет слушатели на курсот за офицери на Армијата на Македонија, Петровска им порача дека стануваат дел од семејството што се грижи за безбедноста на земјата

Свечена заклетва на триесет слушатели на курсот за офицери на Армијата на Македонија, Петровска им порача дека стануваат дел од семејството што се грижи за безбедноста на земјата

by Журнал.мк

Триесет млади граѓани, идни офицери на Армијата на Република Северна Македонија на Воената академија во Скопје, дадоа свечена заклетва по што ќе почнат со своето школување на Воената академија. На свеченоста свое обраќање имаше министерката за одбрана, Славјанка Петровска, која на слушателите на курсот за стручно оспособување и усовршување офицери им порача дека оваа заклетва преставува нешто многу повеќе од изговорените зборови и дека ја симболизира нивната непоколеблива посветеност на каузата која е поголема од нив самите.

„Како идни офицери, ќе ја носите тежината на одговорноста на вашите рамена. Ќе бидете повикани да водите со храброст, интегритет и разбирање. Ќе ви бидат доверени животите на оние што ќе бидат под ваша команда, а одлуките што ќе ги донесете ќе имаат големо влијание врз нивната благосостојба, но и безбедноста на нашата татковина. Затоа, посветено и внимателно учете ги содржините за време на курсот, усовршите ги своите вештини, а вашата цврстина и посветеност нека ги надминат сите предизвици“, рече Петровска.

Министерката Петровска на идните офицери, кои доаѓаат од разни гранки на дејности, им упати благодарност што одговорија на повикот и им порача дека нивната храброст и посветеноста на должноста го претставуваат најдоброто од нашата земја. Идните офицери, рече таа, не се сами на патот кон стекнување на првиот офицерски чин.

„На ова патување не тргнувате сами. Имате целосна поддршка од вашите колеги, вашите професори и нашата земја, која длабоко ја цени вашата жртва и служба. Вие станувате дел од заедница, дел од семејство“, потенцира Петровска.

Деканот на Воената академија, полковникот Митко Богдановски, истакна дека Академијата, именувана по генералот Михаило Апостолски, е симбол на патриотизам, храброст и издржливост.

„Наследството на генерал Апостолски е инспирација за сите што се дел од оваа институција и нè потсетува на жртвите положени за нашата слобода и независност“, истакна Богдановски.

Тој додаде дека со давањето на свечената заклетва нашите идни офицери гордо презедоа одговорност и целосна посветеност на одбраната и безбедноста на нашите граѓани и на сојузниците.

На денешната свеченост присуствуваше и командантот на Командата за обука и доктрини, полковник Васко Коколански, претставници од Воената академија, други гости од Министерството за одбрана и Армијата, како и членови на семејствата на слушателите на курсот.

You may also like

This website uses cookies to improve your experience. We'll assume you're ok with this, but you can opt-out if you wish. Accept Read More

About Us

Журнал МК е независен информативен портал.

Адреса: 8 Ударна Бригада 20б, Скопје, МК
Телефон: + 389 2 3217 815
Email: info @ zurnal.mk

@2022 – All Right Reserved. Designed and Developed by Anet.com.mk