Со 10 гласа за судијата Џемали Саити е избран за в.д претседател на Врховниот суд. Тој ќе ја извршува оваа функција, додека да се избере претседател на Врховниот суд, откако на досегашната претседателка Беса Адеми мандатот и истекува за два дена. Првиот човек на судскиот совет Камбовски рече дека очекува во најскор можен рок да биде избран и перманентен претседател на Врховен.
“Затоа е ставено В.Д. бидејќи во среда истекува мандатот на актуелниот претседател на врховен суд (очекувате за брзо да биде избран претседател?) Па нормално уште тие две работи се останати – тест за интегритет и психолошкиот тест. Значи тоа би било еве наредна седница, да не прејудицирам сега”, рече Александар Камбовски, претседател на судски совет.
Иако согласно законот тест за интегритет не треба да се полага, сепак тоа беше пракса и при изборот на претходните претседатели на Врховен. За претседател на највисокиот суд во државата овојпат конкурираат двајца кандидати – досегашната претседателка Беса Адеми и врховниот судија Африм Фидани. Според законот за судии, шеф на врховен може да биде судија со најмалку шест години непрекинат судиски стаж во суд од ист или повисок степен.
