Најмалку девет лица загинаа поради силната бура која го зафати Кентаки, бура која предизвика поплави на патиштата и домовите.
Екипите за итни случаи сега се во фаза на пребарување и спасување и извршиле над 1.000 спасувања за помалку од 24 часа, рече гувернерот Енди Бешир. Тој ја опиша бурата како „една од најсериозните временски непогоди барем во последната деценија.“
Ги молиме жителите на Кентаки да останат внимателни. Има повеќе од 300 затворени патишта, а (лидерите на државниот сообраќај) велат дека влијанието врз државата е историско“, објави Бешир на социјалните мрежи. „Од свлечишта на исток до снег на запад, ситуацијата е опасна. Ве молам, планирајте однапред, избегнувајте патување и останете безбедни“, рече гувернерот.
Меѓу жртвите има најмалку едно дете, рече Бешир. „Веруваме дека овој број ќе се зголеми“, рече тој. Тој ги повика жителите на Кентаки да не излегуваат на патиштата, додавајќи дека неколку од смртните случаи се предизвикани од сообраќајни несреќи.
Видео снимки направени во повеќе држави прикажуваат превртени дрвја, возила потопени во поплавените води и поплавени куќи, со широки извештаи за поплавени патишта, бизниси и домови во Тенеси, Кентаки и Вирџинија.
Водостоите достигнаа историски нивоа во Кентаки, додека бурата добиваше замав во саботата, соопштија официјалните лица. (CNN)
