Скопски Работнички е најпријатно изненадување во есенскиот дел од шампионатот на Македонија. Со 37 бода екипата на Горан Станиќ презими на делба на првите три места, заедно со Силекс и Шкендија.
Тренерот на „Херојот од Дебар маало“ се наврати на полусезоната и ги пофали своите избраници.
„Огромен успех е што се вклучивме во трката за титулата, иако тоа никој не го очекуваше од нас. Се фокусиравме на секој нареден натпревар и играчите тоа го прифатија. Од есенскиот дел би го издвоил натпреварот против Шкендија во Тетово, каде освоивме бод и не реализиравме пенал.
Наша цел е напролет да бидеме во водечката група. Во клубот сонувавме дека ќе бидеме актери во врвот, а надеж ми даде финишот на минатата сезона. Го надоградивме тимот од минатата сезона и сега имаме тим кој може да се натпреварува со секој ривал“, рече Станиќ.
Пролетниот дел на шампионатот почнува на 16 февруари и преостануваат уште петнаесет кола.
