Фудбалската репрезентација на Србија по крајот на актуелната фудбалска сезона ќе направи промена на главниот спонзор и во иднина ќе набавува опрема од американската компанија „Капели“.
Деби во дресовите од новиот партнер и спонзор Србија ќе има против Англија во квалификациите за Светското првенство на 9 септември во Белград. Според најавите на „Mozzartsport“, дизајнот на дресот ќе биде револуционерен. Имено, Србите размислуваат да се вратат назад и да заиграат повторно во боите на Југославија.
Според најавите, се очекува одново да се врати сино-белата комбинација на дресовите, какви што во минатото носеше репрезентацијата на Југославија. Исто така, со такви дресови настапуваше и селекцијата на Србија и Црна Гора пред двете земји да се одвојат.
Оттогаш наваму Србите играа во други бои, главно црвена или бела, а сега е најавено навраќање наназад. Новата ера со новиот спонзор може да донесе и редизајн на грбот, а останува да се види дали сината комбинација би се користела само за мечот со Англија или и во иднина.
