Фудбалерите на Силекс славеа во последниот меч од седмото коло на ПМФЛ, на гостински терен на Арената „Тодор Проески“ против Вардар со 0-1. Голот вреден победа падна во судиското продолжение, а херој на кратовчани беше Дарко Додев.
Сепак, тоа е погодок кој ќе крене нови полемики во мак-фудбалот. Одново на натпревар на Вардар дојде до драма поради офсајд или гол, а овојпат одлуката беше на штета на најтрофејниот македонски клуб. По една ситуација Јашароски сакаше да уфрли до Додев кој беше во недозволена позиција. Сепак, пасот беше лош, го погоди Мишковски и Ѓуриќ требаше да ја исфрли топката. Шутнатата топка заврши во грбот на Ќосиќ и се одби до Додев кој излета сам пред голот, па го матира Гачевски.
Првичната одлука на помошникот Ѓорѓиев беше да го крене знаменцето, а Пилешков го послуша. Потоа судиите имаа дискусија, си ја објаснија ситуацијата, па главниот арбитар ја смени одлуката и покажа на центарот.
Оваа ситуација предизвика дилеми на гледалиштето и меѓу фудбалерите, негодуваа вардаровите играчи, ама на крајот мораа да го прифатат поразот.
