Силниот ветер во Штип продолжува да прави штета и во попладневните часови. Градоначалникот на Општина Штип, Иван Јорданов за МИА изјави дека пожарникарите во моментов интервенираат на улицата „Браќа Даневи“ во населбата Автокоманда, каде има урнато дел од покривната конструкција на станбена зграда.
Јорданов вели дека дел од штипските населби немаат улично осветлување, поради искинати кабли, а има и скинати кабли на кабелските и интернет операторите. Од утринава екипите на ЈП „Исар“ и пожарникарите од ТППЕ-Штип интервенираа и на отстранување на паднати дрвја и гранки во неколку населби.
МИА информираше дека од силниот ветер паднат е и дел од покривот на Средното електро-машинско училиште „Коле Нехтенин“. Највисокиот дел од покривот на училиштето падна на друг објект, кој се наоѓа до самото училиште. За среќа нема повредени ученици и вработени, ниту уништен имот. Директорката на Средното општинско училиште (СОУ), Јованка Шалева изјави дека учениците се безбедни.
