Шпанскиот премиер Педро Санчез изјави дека во оваа фаза властите немаат информации врз основа на кои можат да извлечат заклучок за тоа што го предизвикало прекинот на електричната енергија низ поголемиот дел од Иберискиот Полуостров. Хаваријата ги погоди Шпанија, Португалија, делови од Франција и Андора.
Во обраќањето до нацијата, Санчез рече дека во моментов нема ризици за националната безбедност, дека плаќањата се вршат навреме и дека дигиталното банкарство не е суспендирано.
Сепак, Санчез додаде дека телекомуникациите се во критичен момент и нагласи дека луѓето треба одговорно да ги користат своите телефони и само за кратки повици.
Санчез рече дека Советот за национална безбедност на Шпанија повторно ќе се состане за да одлучи какви други мерки да преземе.
