Опозициската СДСМ изрази силна поддршка за секој чекор насочен кон расчистување на евентуални злоупотреби на јавните ресурси и потенцијалната корупција. Во соопштениеот на партијата, се истакнува дека одговорноста и транспарентноста се основни принципи кои ја градат довербата на граѓаните во институциите и дека никој не смее да биде над законот.
„Бараме од институциите брза, транспарентна и темелна истрага која ќе ја утврди вистината. Доколку постои вина, истата треба да се санкционира во согласност со законите“, велат од СДСМ.
Партијата ги повика Министерството за внатрешни работи, Обвинителството и сите релевантни институции да постапуваат професионално и без селективност, истовремено нагласувајќи дека борбата против корупцијата и изградбата на институции кои работат во интерес на граѓаните остануваат во фокусот на нивната политика.
Инаку во рамки на операцијата „Адитив“, која е насочена кон откривање на злоупотреби во ЕСМ и Пошта на Северна Македонија, Обвинителството за гонење на организиран криминал и корупција спроведе 77 претреси во неколку градови: Битола, Неготино, Велес, Кичево и Скопје.
Обвинителството соопшти дека биле одземени 208.000 евра, 30 мобилни телефони, УСБ стикови, компјутери, лаптопи и патничко моторно возило БМВ од понов датум.
Покрај претресите, обвинителството побара притвор за 9 лица, додека за 13 лица се бараат мерки за обезбедување присуство, а за петмина е замрзнат имотот. Според обвинителите, имотот е замрзнат за да се спречи можноста за негово отуѓување или прикривање.
Поранешниот директор на ЕСМ, Васко Ковачевски е во бегство, а за осум други од групата судија на претходна постапка денеска им одреди притвор. Еден осомничен оди во куќен притвор, а за останатите определени се мерки на претпазливост со одземање на патната исправа.
