„100 дена владеење на Христијан Мицкоски и ВМРО-ДПМНЕ е период на изговори, скандали, разочарувања, изневерени ветувања и назадување,“ се вели во соопштението на СДСМ, која жестоко ја критикува тековната власт. Според СДСМ, „досега немало влада со толку лош почеток на владеењето.“ Тие предупредуваат дека ако „денот се познава по утрото, уште полошо ги чека граѓаните и државата со Мицкоски и ВМРО-ДПМНЕ.“
Владејачката структура, според СДСМ, ги изневерила граѓаните со тоа што „сите нејзини ветувања пред изборите ги замени со изговори зошто не може да ги реализира.“ Како пример, тие наведуваат дека „ветуваа поголеми плати, а просечната плата се намали за 1.000 денари.“ Дополнително, СДСМ тврди дека нема покачување на минималната плата, ниту на платите на наставниците и другите работници.
„Ветуваа поголеми пензии за 5.000 денари, а не можат да испорачаат ниту половина,“ стои во соопштението. Во однос на јавниот долг, СДСМ ја обвинува владата за зголемување на долгот на граѓаните за „над 60%“, наведувајќи дека Мицкоски ја задолжил државата за „500 милиони евра сомнителни кинески пари.“
Во делот на безбедноста, СДСМ тврди дека власта на Мицкоски не успеала да ја гарантира сигурноста на граѓаните: „Безбедноста на граѓаните е загрозена поради неспособноста на власта на Мицкоски. Се случија 10 убиства и обиди за убиства, а расчистено е само едно.“ Пукањата, палењето автомобили и криминалот се, според СДСМ, секојдневие.
Дополнително, тие ја обвинуваат владата за „масовна партизација наместо професионализација“ на безбедносните структури и другите институции, со што, како што тврдат, „се загрозува функционирањето на системот.“
СДСМ во своето соопштение исто така ја обвинува Владата дека ги прекинала преговорите со ЕУ и ја довела земјата „во политички ќорсокак.“ „Од земја со јасна перспектива напред, Мицкоски реши да ја затвори и изолира уништувајќи ја надежта дека тука ќе се живее подобро,“ се вели во соопштението, додавајќи дека со оваа влада „може само да очекуваме уште повеќе иселување, економска стагнација и целосен застој во развојот на државата.“
